Kay Tungod ang Tawo, Tawo Man

Wa ko kasabot nganung gamay'ng problema hilakan
Dili ba matag unos aduna may adlaw na musidlak?
Dili ba matag problema aduna may tagsa-tagsang solusyon?
Masulbad ba ang problema kung pug-an ang mga mata ug luha?

Wa ko kasabot nganung ang tawo kung kusi-on mubalos man ug hapak
Dili ba klaro ang panultion nga Kung labayon ka ug bato, hala labaya ug pan?
Mawala ba ang sakit sa kusi kung mubalos ka ug hapak?
Dili ba muhubag na hinuon ang imong kamot kung maninguha ka ug balos?

Wa ko kasabot nganung ang tawo dili gayud makontento
Kay tungod dili naman uso ang cellphone na slide2x
Adto napud sa cellphone na wala'y keypad
Dili ba parehas raman na sila na cellphone?
Muabot pa kaha ang panahon na mu-undang ang tawo
sa paggasto sa mga butang nga wala'y hinungdan?

Niining kalibutana, daghan gayud ug mga dili mahisabtan
Apan kung imong huna-hunaon ug imong sukit-sukiton
Kining tanan aduna ra'y usa ka rason
Ug kana kay tungod ang tawo, tawo man.